مسرحية قصيرة: حكيم واش بيك؟
المشهد الأول
خشبة خاوية تقريبًا. كرسي. طابلة صغيرة. قنينة ماء. قيتارة. حكيم كيدخل بشوية، حاضي الأرض، بحال شي واحد نسى علاش جا. كيجلس على الكرسي. كيحل قرعة د الماء. غادي يشرب… كيوقف. كيشوف الجمهور فجأة.
بغيت نشارك معاكوم مشكلتي…
(كيشد فراسو )
الزحام.
و الله تا كاين زحام فراسي.
أنا بغيت نشرب الما كالمومون…
ولكن كلشي بغا يهضر وسطي.
كلشي.
(كيشير بيديه لكرسي حداه و تياجلس فالكرسي ديالو)
ها هو عبد الله مثلًا.
ولد خالي.
جالس هنا من يامات عائلة سي مربوح.
ما كايهضرش.
غير كايشوف ليا هكا…
(كيشوف فالجمهور و فمو مفتوح بحال شي واحد مصدوم.)
بحال لا كايقول:
“واش نتا هو حكيم اللي كان كايسرح معايا المعز؟”
(كيضحك بوحدو)
المشهد الثاني
(كيوقف ويتمشى.)
ومن بعد كايبدا الفيلم…
أيت عيسى… مدرار...تخوالت...بني تدجيت...فجيج... التراب…
الشمس… البلاد... والمعيز اللي كان كايكرهني شخصيًا.
أقسم بالله.
كانت واحد المعزة ما متقبلانيش.
كل مرة تشوفني…
(كيدير راسو معزة.)
“ماع… ماع”
يعني:
“هاد السيد غادي يكبر ويتعقد.”
(كيتجه للكرسي الخاوي كيدير يديه عليه)
ومن بعد كايجي كمال…
آه كمال…
داك النوع ديال المراهقين، لي بلا ميدير والو، كيخليك كطفل...تكبر بكري بزاف...كاتولي كاتحس براسك ما بقيتيش دري صغير.
(صمت.)
الغريب…
هو أن هاد الأسماء كاملين…
باقيين ساكنين فيا.
بلا كرا.
بلا احترام.
بلا حتى شي مساهمة فالمصروف.
(كيخرج تلفونو.)
حتى التصاور القديمة…
كنحل التصويرة جوج ثواني…
ونسدها دغيا.
بحالا الماضي شدني حافي
(كيشد القيتارة.)
أنا أصلًا ما باغيش بزاف.
ما باغيش نبدل العالم.
العالم حتى هو خاصو يرتاح شوية.
أنا باغي…
شي بنت تبغيني بصح…
دار صغيرة…
أرض…
نعناع ومطيشة…
ووليدات نغطيهوم بالليل ونقول ليهوم فخاطري:
“الله يصبحكوم على خير”
(كيعزف موسيقى بشكل تلقائي، تيحط قيتارة)
المشهد الثالث
(صمت قصير.)
توطاكو…
كلشي كايسكت.
الأصوات.
الذكريات.
حتى أنا.
(كيشوف فالقرعة دلما بشوية و كيهزها)
وكنستوعب…
أني من شحال هادي…
جالس بوحدي…
كنشرب الما…
وكَنهضر مع راسي.
(كيشرب شوية ماء.)
وباقي…
باغي غير…
ندخل للبيت و نحس براسي مامازحمش.
(كيهز قيتارة من جديد، كيلعب قطعة مسيقية)
نهاية.
ك.ج
تعليقات
إرسال تعليق